ก้อยกะปอม ของแซบอีสาน

0
332


     มื้อนี้อากาศฮ้อนหลาย  นั่งเล่นคิดไปคิดมาแล้วนึกถึงบรรยากาศเก่าๆครับตอนอยู่บ้านนอก  กะเลยคึดอยากกินก้อยกะปอม ของดีของแซบอีสานบ้านเฮายามนี้    เว้าเรื่องก้อยกะปอม  แต่ก่อนนั่น  เว่าให้ผู้ลังคนฟังว่าสิพาไปกิน ก้อยกะปอม ผู้ลังคนกะสั่นหัว  แถมมาว่าเฮากินอีหยังไปทั่วไปทีบ เป็นตาขี้เดียดแท้ เพราะเพิ่นคึดว่า ก้อยกะปอม สิเป็นคือก้อยกุ้ง ก้อยปลาซิว หละตี้ ที่เอากุ้ง เอาปลาซิวโตเป็นๆ มาก้อยใส่ข้าวคั่ว ใส่แจ่ว กุ้งเต้น โด่งเด่ง โด่งเด่ง กะเลยคึดว่าเฮาสิเอากะปอมดิบๆมาก้อย  แต่หารู้บ่ว่าตั้งแต่คิดกะผิดแล้วครับ  นั่นหละเขาเอิ้นว่า ” วีค้อนกลายบักม่วงอะ” เอิ๊กๆๆๆ เอาจั่งซี้กะแล้วกันเดี๋ยวสิเว้าสู่ฟังเด้อพี่น้อง 

 

อันดับแรกเฮากะต้องเตรียมอุปกรณ์เฮ็ดไม้คล้องขึ้นมาสาก่อน  กะคือเฮ็ดบ้วงผูกปลายไม้ไผ่สียาวๆเติบ หรือผู้ลังคนขี้คร้านเหลาไม้ไผ่  กะเอาไม่ลำปอ ลำใหญ่ๆกะได้คือกัน เวลาไปหาคล้องกะปอม เฮากะต้องใช้วิธี มองไกล คือจั่งไปไล่แย้นั่นหละ  เหลียวไปต้นไม้ไกลๆเติบ เพราะว่าขี้กะปอม มันสิลงมาหากินอยู่ต่ำๆ ถ้ามันตื่นคน มันจั่งสิไต่ขึ้นต้นไม้ที่สูง  วิธีที่สิเฮ็ดให้กะปอม บ่ตระหนกตกใจง่ายกะคือ เฮาต้องผิวปากไปนำ  ย่างไปนำผิวปากไปนำ   อาจสิผิวเป็นทำนองได๋กะได้ ลูกทุ่ง สตริง หมอลำ    ขี้กะปอมมันมักเหมิด  กะปอม  พอมันได้ยินเสียงผิวปากของคน มันกะสิเคลิ้ม ตอดเงาง๊อกๆ เฮากะเอาบ้วงไปคล้องคอ แล้วกะ ซิดปั๊บ ขี้กะปอมกะติดบ้วง อ้อนต้อน ปลดใส่ข้องเลย  555 !!! 

คันแมนบ่มักคล้องหรือว่ายามไปคล้องแล้ว  มันแล่นขึ้นกกไม้ก่อนจำเป็นต้องเป็นมือเพชรฆาตกะคือ ยิงเอา อาจสิใช้หนังสะติ๊ก หรือเป่าพลุ กะได้ เวลาเห็นกะปอมกะยิงเลย แต่ควรสิยิงตรงหัวมันเด้อ ถ้ายิงโตมัน มันขี้แตก เน่าง่าย เอามาก้อยบ่แซบ ข้อดีของวิธียิงเอากะคือ ถึงแม้กะปอมสิแล่นขึ้นต้นไม้สูงปานได๋ เฮากะยิงถึง  บางทีกะปอมโตเดียว ใช้ลูกกระสุนเหมิดเป็นหอบ โดยเฉพาะกะท่าง หรือกะปอมก่าแหล่ มันสิแล่นขึ้นปลายไม้สูงเร็ว แต่ข้อเสียกะคือ กะปอมมันสิตายมันบ่สด ท่อไปคล้องเอา

ล่ามาได้หลายเติบแล้ว เฮากะเอากะปอมที่หาได้นั่นหละ มาเฮ็ดแนวกิน    กะปอมหรือขี้กะปอมนั้น   สามารถนำมาประกอบอาหารได้หลายอย่าง เช่น เอามาปิ้งกินเลยกะแซบ หรือสิตากแห้งไว้ทอด กะดี ผัดเผ็ดกะปอมกะแซบบ่ค่อย หรือสิเอามาก้อย ก้อยนี้หละคือของนิยมหลายแซบอย่างขนาด

เอามาแล้วกะจัดการลอกหนังออกสาก่อนเพื่อเตรียมไปปิ้งให้มันสุกต่อไป…เว่ามาฮอดนี้เริ่มสิน้ำลายเฮื่อแล้วครับพี่น้อง…เอิ๊กๆๆๆ

จากนั้นขั้นต่อไปกะปิ้งให้มันสุกก่อนเด้อ..(กินดิบบ่ได้เดี๋ยวเขาสิว่าเป็นปอป..อิอิ)

ปิ้งสุกแล้วกะนำมาขึ้นเขียงได้เลยบาดทีนิ  เอามันมาเชือด..เอ๊ย..เอามาฟักให้มันแหลกสาก่อนเดี๋ยวมันสิหย่ำบ่ได้คาคอ  ฟักแหลกๆแล้วกะขั้นต่อไปเลยครับพี่น้องพยาธิเริ่มฮ้องแล้ว…5555

ฟักละเอียดแล้วกะขั้นต่อไปเลยครับ..เตรียมไว้ให้พร้อมอย่าให้ขาดเด้อเครื่องปรุง   บ่ว่าสิเป็นบักม่วงป่า   บักม่วงน้อย  ข้าวคั่ว  หัวหอม อย่าให้ขาดดี๊ๆเตรียมไว้ถ่าใส่….

ทุกอย่างพร้อมแล้วกะเอาใสครกตำให้เข้ากันซั่นตั๊วะ  เพื่อความแซบเพื่อความนัว(อันนี้กะขึ้นอยู่กับคนเฮ็ดเด้อว่าสิเชฟกะทะเหล็กหรือเชฟกะทะทอง)

ขอบคุณข้อมูลจากคุณหนุ่ม ดอนกอก

ทิ้งคำตอบไว้

Please enter your comment!
Please enter your name here